相信唔少曾經睇過Live Music Show、Gig、演唱會嘅朋友，都會發現想像同現實不乎。去得睇Show，當然想開心盡興，不如睇睇以下一啲音樂活動同演唱會嘅不明文規定，試吓由自己做起帶動大家改變啦！
1. 唔同人唔同個性，對睇Show都會有唔同期望，就算係同一場表演，都會有人表現得熱情啲，有人會內斂啲，不妨望望自己周圍嘅觀眾表現同自己一唔一樣，唔一樣就醒水自動「物以類聚」咁移位。想Fing想跳想郁嘅，多數會企前啲近啲表演者；怕羞或者冷靜型，多數都會揀場地較後較邊位置。識得揀位移位，就唔會出現俾隔離觀眾Fing到頭暈眼花，或者覺得隔離觀眾掃興嘅感覺啦！
2. 如果你約人睇Show其實係想認識多啲你個Friend，或者係想聚吓舊，咁就建議你慳返入場費，改去餐廳、Coffee shop好過啦。去Live Show就應該專心睇表演，並唔係一個傾計吹水嘅場合，一黎對方好辛苦至會聽到你講咩，二黎會影響其他專心睇表演嘅觀眾，三黎唔尊重表演者。
3. 如果表演係坐低睇嘅，就唔好郁黎郁去又尖叫咁忘晒形啦，大家都係坐定定，甚至乎劃左位，其他觀眾好難調位避開你架……
4. 早咗到達，當然有權揀選心水位置，但如果大部分觀眾已經到達，你先至去到場地，咁真係麻煩你唔好推吓推吓咁穿越人群迫去台前啦……咁樣其實同打尖無異。想要靚位早啲到咪得囉～
5. 如果係企位、場地大又多人的話，建議唔好飲咁多嘢，尤其是酒精飲品。大家都聽到Un吓Un吓，有時又會有人經過，拎住嘢飲真係唔多方便，仲要個幾兩個鐘就要去吓廁所，迫迫迫去又迫迫迫返黎，你唔煩人地都煩啦～
6. 好Enjoy咁跟住唱OK，但唔好同表演者鬥大聲……大家係黎聽表演者唱，唔係聽你唱呀！
7. 一邊睇表演一邊拍片？咪搞啦……睇現場表演梗係全人類舉高手、全情投入、活在當下Live in the moment啦！淨係掛住撳掣對焦睇住個Mon，講真，邊聽得入耳呀。仲有呀，你拎住部機係咁影，會遮到同影響到其他觀眾架！再講，影完呢啲又震又Chok嘅片同相，你根本唔會再睇返，就算睇都上YouTube睇高清片啦！你偶像明明喺你面前，你竟然唔望實佢望個Mon？！
8. 表演者表演完每一首歌，作為觀眾，就算唔歡呼，都記得拍手呀！保持良好氣氛人人有責，表演者又開心，你自己又會更加投入，拍吓手啫，唔需要怕羞架～
9. 如果表演者冇邀請觀眾點歌，就唔好大嗌歌名啦，表演者一早已準備好Setlist，大嗌其他歌名只會騷擾到個Show，同埋……你自己唔尷尬架咩？
10. 講到尾，Respect就OK！仲有個小Tips，如果喺場外買咗紀念T-shirt，應該立即著上身！一黎可以輕輕鬆鬆睇Show，二黎一定唔會整唔見！
即刻click入黎睇睇黎緊有咩音樂活動先！