收音器材主要分兩大類，一種係睇show時經常見到嘅動圈咪，另一種係youtuber唱歌錄音時會用嘅電容咪。
歌手表演多數會用動圈咪(Dynamic microphone)，結他、bass、鼓都會用動圈咪收音，因為動圈咪可以承受較大嘅聲響，唔容易因為聲音太大而有feedback或拆聲，所以係夾band同出show神器，同時亦好適合用於較大聲樂器嘅錄音。不過，留意返，正正因為呢個原因，經驗尚淺嘅歌手用動圈咪唱歌時會較易唔夠聲。動圈咪另一個好大嘅優點就係佢非常之襟用，好似Nokia手機咁，無論跌幾多次跌得幾甘都好，都依然可以如常使用，用好多年都完全冇問題！
電容咪(Condenser microphone)嘅敏感度就高得多喇！最啱做studio錄音咪，幾微細嘅聲音喺電容咪前都會無所遁形。Live表演時，鋼琴同鈸都可以選用電容咪收音。相比動圈咪，電容咪比較需要handle with care，如果小心使用，都可以用到好幾年！